Kudu bau mun teu seungit
Puguh seungit lain nu urang
Panjang karasa nyugakna
Pondok karasa nyogokna
Elmu ukur bangkarak
Mangsa teu jadi tapak
Ngagurat di jalan satapak
Kiwari loba tibalik
Biwir luhung laku linglung
Cul dog dog tinggal igelna
Rengkenek sulaya tina gamelan
Suling teu wawuh jeung gelikna
Kacapi teu apal ka jentrengna
Tarompet ukur toetna
Alus lain ukur basa
Hade lain ukur carita
Intelektual teu jadi ukuran
Bijaksana jeung muliana jelema
Lamun teu ka ambeu bau
Komo deui ka ambeu seungit
Teu karasa nyugak komo nyogok
Teuing sajak teuing naon di sebutna
Nu jelas lain bangke lain malati
Bangke mah kaambeu bauna
Malati ka ambeu seungitna
Ieu mah teu bau-bau acan komo nyeungitan
Ah, lieur teuing naon ieu ngaranna
No comments:
Post a Comment
Silahkan anda berkomentar, namun tetap jaga kesopanan dengan tidak melakukan komentar spam.